Villabonako Santiago jaien egitaraua aurkeztu da Erreboteko plazan, Santio jaien epizentroan.
Ekitaldian izan dira Beatriz Unzue alkatea, Ander Goikoetxea kultura zinegotzia, Joxean Cubero Udaleko kultura saileko teknikaria eta jai batzordean eta jai egitarauaren diseinuan aktiboki parte hartu duten hainbat herritar.
Joxean Cubero, Amasa-Villabonako kultur teknikariak Santio jaietako kultur teknikariak, egitaraueko zenbait berrikuntza azaldu ditu. Hasteko, uztailaren 22an, Oinkari Dantza Taldeak, bere emanaldi berria aurkeztuko du, "Errotan".
Uztailaren 23an, Ruslan Ponomariov munduko xake txapeldun ohia jaietan izango da 25 jokalariren aurka aldi berean partidak jokatzen.
Otsabi Fest ere aipatu du, uztailaren 25ean ospatuko den festa, Villabonako artisau eta sortzaileek sortutako jaialdi honek sormena, kultura eta zaintza pertsonala uztartuko ditu. Loatzo Musika eskolako bandaren kontzertua ere uztailaren 25ean izango da, lehen aldiz Santio jaietan.
Haur eta nerabeentzat ere, berrikuntzak egongo direla jakinarazi du Cuberok, parkeak hain zuzen. Arroako plazan egongo da, F-1 simuladoreak, skate simuladoreak, errealitate birtuala, dance eta txikientzako ludoteka eta makillajearekin osatua.
Bestalde, Beatriz Unzue alkateak jaien inaugurazio ekitaldiari buruzko xehetasunak eman ditu. Aurten, Santio jaiei hasiera emango dien metxa pizteko ohorea Salbadora Jubilatuen elkarteko kideek izango dute. Azpimarratu du, baita ere, hori izango dela Santio jaiek iraungo duten zortzi egunetan botako den suziri bakarra; izan ere, jai batzordeak, zarata horiek bereziki eragindako herritarren eskaerari erantzunez, aho batez erabaki du petardoen erabilera mugatzea, jai inklusiboagoak sustatuz.
Eraso matxisten aurkako protokolo bat ere martxan dutela adierazi du alkateak eta herriko mugimendu feministarekin protokolo hau diseinatzeko eta adosteko egindako lankidetza estua azpimarratu du.
