Domina kolkoan, irribarrea ahoan

Tolosako Usabal kiroldegiko tatamian poztasuna nabari da, ez da gutxiagorako, aurreko astean Las Vegas-en jokatu zen judoko Nage No Kata modalitateko Munduko Txapelketak biharamun gozoa utzi du. 23 urtez azpikoetan Joseba Etxarri eta Joseba Regillagak urrezko domina lortu dute; senior kategorian berriz, urte luzetako lan onaren isla den zilarrezko domina kolkoratu dute Unai Saralegik eta Unai Reguillagak. Irribarretsu birgogoratu dute Munduko Txapelketako jarduna.