Irailaren hasiera errutinara itzultzearekin lotzen bada ere, zizurkildarrak prest dira jai giroko astea pasatzeko. Irailaren 3an, asteazkenez, egingo dira Elbarrenako jaietako lehen ekintzak. Txupinazoa ostegunean jaurtiko da, ostirala Gazteen Eguna izango da eta larunbata kuadrilena. Hilaren 7an, igandea, iaz jaiotako herritarrei ongietorria egingo zaie, astelehenean bertso saioa izango da eta irailaren 9an Jubilatuen Eguna ospatuko da. Lotura honetan ikus daiteke Elbarrenako jaietako egitaraua.
Kros mistoa
Asteazkenean, 19:00etan hasita, jokatuko da Zizurkilgo kros mistoaren XVI. ekitaldia. Parte hartzaileek bost kilometroko ibilbidea osatu beharko dute, Elbarrena auzoko zirkuituari lau itzuli eman beharko zaizkio. Izen-ematea doakoa izango da eta korrikalariek afarien zozketan parte hartuko dute. Dutxa zerbitzua ere eskainiko zaie kirolariei. Lasterketa nagusiaren aurretik, haurren probak (2012an edo ondoren jaiotakoak) egingo dira. Iazko krosa Jexux eta Ane Iturriak irabazi zuten.