Larunbatean, ekainak 17, kuadrillen eguna ospatuko da Tolosan eta horren harira, etenak egingo dira trafikoan
Esate baterako, Rondilla kalea ibilgailuentzat itxita egongo da goizeko 10:00etatik gaueko 22:00etara. Ondorioz, autobusek ezingo dute erdigunera sartu eta ibilbidea herritik kanpo egingo dute. Hori horrela, Rondilla zein San Frantziskoko autobus geltokiak itxita egongo dira eta Santa Klarara lekualdatuko dira.
San Frantzisko ibiltokia itxita eguerdira bitarte
Rondilla kalearen itxierarekin batera, San Frantzisko ibiltokia ere ibilgailuentzat itxiko da eguerdia bitarte, Oriako Txirrindulari Elkarteak antolatutako kirol proba dela eta. Horrez gain, larunbateko ohiko azoka, Euskal Herria plazakoa, hain zuzen, San Frantziskora lekualdatuko da, aipatu plazan kuadrilla eguneko bazkarirako prestatze lanak egingo baitira.
