Amasa-Villabonako EAJ-PNV udal-alderdiak atzo egindako adierazpenen aurrean, Gipuzkoako Foru Aldundiko Jasangarritasun Departamentuak komunikatua zabaldu du. Bertan herritarrei jakinarazi nahi die "Amasa-Villabona eta Irura lotzen dituen bidegorriaren azpiegitura indarreko araudi tekniko eta legalaren arabera diseinatu, gauzatu eta baliozkotu dela".
Jasangarritasun Departamenduak araudiaren araberako seinaleztapena betetzen duela nabarmendu du, "Bidegorriak seinaleztapen horizontala du, zirkulazioaren trazadura eta noranzkoa markatzen duten lerro etenen bidez. EAJk, N-1aren gaineko zubiak duen segurtasuna jarri du zalantzan, honen aurrean, eskaileretara sartu aurretik ikusmen-desgaitasuna duten pertsonentzako ohartarazpen-banda podotaktikoak dituela azpimarraten du Aldundiko Jasangarritasun Departamenduak.
Irisgarritasunari dagokionean, eskailerek arauak betetzen dituztela dio Aldundiak eta elementu bertikal gehiago jartzerik ez dagoela gehitzen du.