Urtarrilaren 24an proiekzio berezia izango da Leidor Aretoan: Isiltasunetik, munduari begira dokumentala eskainiko da, gorrak diren eskualdeko bi pertsonak Marokon zehar egindako bidaia baten bidez, entzumenaren eta isiltasunaren arteko elkarbizitza hizpide duen lana.
Itziar Agirrebarrena Beldarrain lizartzarra eta Enrike Zeberio Berger tolosarra dira filmeko protagonista nagusiak; gorrak dira biak jaiotzetik, eta Josu Iztueta bidaia-gidari tolosarraren laguntzarekin Aste Santuan Marokora egindako bidaia du oinarri.
Dokumentalaren proiekzioa 20:00etan izango da, Leidor Aretoan, eta ondoren solasaldia izango da proiektua landu duten protagonistekin. Zeinu hizkuntzako interpretazio zerbitzua izango da. Ikuskizunerako gonbidapenak doan eskuratu ahal izango dira, leihatilan bertan.