Gaur goizean egin du AEK-k 23. Edizioaren aurkezpen-ekitaldia Donostiako San Telmo Museoan. Oraingoan Irunen emango diote hasiera euskararen aldeko mobilizaziorik handiena, eta hamar gauren eta hamaika egunen ondoren, Baionan irakurriko dute lekuko barruko mezu sekretua. Egun osoan zehar, ekitaldiz beteko da Lapurdiko hiriburua.
AEK-k honakoa adierazu du ekitaldian: «aurreko edizioko parte-hartze masiboak argi utzi zuen gure hizkuntzaz harro gaudela eta guztion artean komunitate sendoa osatzen dugula. Oztopo guztiak gainditzeko gai den herri harroa, eta harro KORRIKAn».
KORRIKAren mezua
Harro herri, euskaraz jakin zein ez, har dezagun
dimentsio orotan eragiteko konpromisoa, herria batuta.
Harrotasunez! Konplexuak gainetik kendu,
mugi dezagun euskararen herria, ingurua mugiarazi arte.
Harro hadi Kantauri itsasoa,
Arabako mahats, Bardeako buztin.
Harro zite Pirinioetako elur, Meatzaldeko burdina.
Elkarrekin nahi ditugu pausoak egin,
espazio berriak irabazi eta, hitzez zein ekintzez,
aldarri egin.
Gauden harro garenaz, eta egiten dugunaz.
Bete ditzagun etxe eta kaleak euskaraz.
Harro plazan, online zein kanpoko bizitzan.
Harro herri, eta harro KORRIKAn!
23. KORRIKAren informazio guztia korrika.eus webgunean.