Astelehenean zabalduko da ekainaren 15erako izena emateko hitzorduen aplikazioa. Hemendik aurrera, 15 egunez behin NANa eta pasaportea berritzeko aukera izango dute tolosarrek, herrian bertan. Aurretiazko hitzordua hartu beharko du interesa duen orok, horretarako, inprimakia bete beharko da, eta hitzordua aukeratu. Lehen txanda 08:30ean hasiko da eta azkena, 14:06an.
Zita hartzeko garaian kontuan izan behar da, besteak beste, pasaportea eta NANa aldi berean berritu nahi dituenak bi hitzordu hartu beharko dituela, eta hitzordu bakoitza pertsona bakarrarentzat izango dela.
Zerbitzuak emandako jarraibideen arabera, hitzordua hartzeko aplikazioa zerbitzua jaso baino 15 egun lehenago aktibatuko da. Hitzordua baieztatzen duen mezuarekin batera, informazio gehigarria eta hitzordura eraman beharreko dokumentazioari buruzko informazioa ere jasoko da.