Jendez bete da Trianguloa plaza gaur iluntzean, pasa den ostiralean Nafarroako herrian jazotako erailketa matxista salatzeko.
Tolosaldeko Mugimendu Feministak “amorruz” eta “minez” gaitzetsi du joan den asteko gertakaria: “Duela bi egun salaketa larri bat egin genuen; eta azken muturreko indarkeri espresioa, erailketa, gaitzetsi behar dugu gaurkoan. Bi hilabete ere ez dira pasa urtea hasi denetik” adierazi dute kideek, urtarrilean Tolosan gertatutako sexu-erasoa salatzeko ostiralean egin zuten elkarretaratzeari erreferentzia eginez.
Aldi berean, Tolosako Udalak adierazi du “herriko mugimendu feministarekin bat, indarkeria matxistarik gabeko herri baterantz urratsak emanez jarraitu nahi duela”. Horren harira, edozein indarkeria matxista mota jasaten duten emakumeek Andragoran babesa jaso dezaketela gogorarazi du Udalak.
Eraildako emakumearen senide eta ingurukoei elkartasuna adierazi die Tolosako Udalak eta Tolosaldeko Mugimendu Feministak.