Tolosak prest du dagoeneko Tolobolei Txapelketaren XV. edizioa, irailaren 2tik 6ra jokatuko dena. Herrian giro berezia sortzen duen boleibol lehiaketa honek berriro ere ehunka lagun bilduko ditu Euskal Herri Plazan.
Aste osoko egitaraua
Txapelketa asteartetik larunbatera ospatuko da. Asteartetik ostiralera ligillak jokatuko dira, eta larunbatean iritsiko da unerik zirraragarriena, kanporaketa eta finala. Aurten guztira 27 talde ariko dira lehian, eta horrek 180 partaide inguru bilduko ditu.
Ordutegiak honela banatuko dira:
- Asteartetik ostegunera: 16:30 – 23:00
- Ostirala: 16:30 – 00:00
- Larunbata: 09:30 – 20:00
Berikuntzak
Edizio honetako berrikuntza nagusia ostiraleko gau tematikoa izango da, “Brasil” izango duelarik ardatz. Gainera, asteartetik ostegunera bitartean zozketak egingo dira, eta boletoak txosnan erosi ahal izango dira.
Larunbateko finalaren atarian, klubeko gaztetxoek ere jokatuko dute. Horrela, etorkizuneko jokalariak protagonista bihurtuko dira, ikusgarritasuna emanez urte guztian egiten duten lanari.
Historia eta klubaren sorrera
Txapelketa hau Tolosako ostalariek jarri zuten martxan lehen aldiz, herriari bizia emateko asmoz. Harrera bikaina izan zuen eta urtez urte indarra hartzen joan da: hasieran asteburu bateko kontua bazen ere, gaur egun aste osoko ligilla bihurtu da.
Txapelketaren arrakastak ekarri zuen Tolobolei Klubaren sorrera. Klubak jada 10 urteko ibilbidea du eta boleibola sustatzeko ezinbesteko eragile bihurtu da Tolosan.
Gaur egun, 220 gazte ari dira klubean jokatzen, eta beste 80 gazte ere badira sartzeko gogoz, baina taldearen kudeaketa mugak jartzea behartzen dituela adierazi dute. Klubaren baitan maila ezberdinetako taldeak daude, eta urtez urte hazi da zaletasuna.