Tolosako Hiribusaren ibilbide berria datorren astelehenean, irailaren 1ean, jarriko da indarrean. Horrek aldaketak ekarriko ditu hainbat geltokiren kokapenean, zein ordutegietan. Helburua zerbitzua hobetzea eta biztanle gehiagorengana iristea da, gidarien gomendioak eta erabiltzaileen eskaerak kontuan hartuta.
Enpresa emakidadunak erabateko prestutasuna azaldu du neurri berriak aplikatzeko, eta aldaketak behin-behinekoak izango dira: hurrengo hilabeteetan baloratuko da zein puntutan funtzionatzen duten ondo eta non behar diren doikuntzak. Tolosako Udalak gogorarazi nahi izan du gainera, Hiribusaren kontratu berria datorren urteko udaberrian sinatuko dela.
Ibilbide nagusiaren berrikuntzak
Hemendik aurrera, Larramendi kalea izango da Hiribusaren irteera eta helmuga nagusia, gasolindegiaren parean kokatuta, eta kale horretan bi geldialdi egingo ditu. Hortik aurrera, autobusa San Frantzisko pasealekutik Araba etorbidera joango da eta 5. zenbakiaren parean geldituko da, gainerako autobusek geldialdia egiten duten geltoki berean. Iurre auzoan ere aldaketak izango dira: Iurramendi pasealekuko 1. zenbakiaren ondoan egingo du geldialdia hiribusak, biribilgunean beharrean. Paper kaleko ibilbidea kontrako norantzan egingo du, Berazubi aldera, eta ondorioz, bertako geralekua ere lekuz aldatu da. Berazubin, Tolosako C.F. plazako geltokia kendu da eta autobusak Martin Jose Iraola kaleko biribilgunean geratuko dira, 16. zenbakiaren parean. Azkenik, Iurramendiko egoitzara ez da gehiago igoko, maldak sortzen dituen arazoengatik; horren ordez, egoitzaren beste aldean egingo du geldialdia, Kondeaneko Aldaparekin bat egiten duen puntuan.
Geltoki berriak eta zerbitzu osagarriak
Auzoetan ere nobedadeak izango dira. Usabal industri-gunean Amarotzeko sarrerako zubian egingo du geldialdia, bertako bizilagunek autobus zerbitzua hurbilago izan dezaten. Amarotzen, 29. zenbakiaren parean dagoen geltokia ez da jaitsierakoa bakarrik izango, igotzeko ere balioko du. Bestalde, larunbat arratsaldetan hiru zerbitzuk hilerriraino igoko dira irisgarritasuna bermatzeko. Asuncion Klinikatik, autobusa, ez da Santa Klarara jaitsiko; Santa Lutzia auzoan barrena egingo du bidea eta berriro Larramendi kalera itzuliko da. Gainera, ikasturtean zehar, eskolako sarrera eta irteera orduetan, autobusa Samaniego, Orixe eta Tolosaldea LHI ikastetxeraino igoko da.
Ordutegi berriak
- Eguneko lehen zerbitzuak aurreratuko dira, ikasle eta langileak (Samaniego, Orixe eta Tolosaldea LHI) garaiz iritsi daitezen.
- 07:50eko zerbitzua azkarragoa izango da eta zortzi geraleku baino ez ditu egingo: Larramendi 11, Musika Eskola, San Frantzisko pasealekua (A.M. Labaien plazaren parean), Iurre auzoa, Usabal, Iruña etorbidea, Kondeaneko aldapa eta Samaniego.
Informazioa erabiltzaileentzat
Aldaketa guztien xehetasunak geltokietan itsatsiko dira eta baita autobusean bertan ere. Gidariari eskaturik ordutegi eta ibilbide berrien taulak jaso ahal izango dira, eta informazio osoa online ere eskuragarri dago: http://tolosa.eus/hiribusa