Herriek martxan jarraitu behar dute, ordea, eta hauteskundeak iristen dira, askotan nahi baino azkarrago: "lau urte igaro al dira dagoeneko?", eta lau urte zaharrago. 2023 urtean ere, Tolosaldeko 28 herrietan zerrendak osatu dituzte, eta ehunka pertsonek bete dituzte; ia gehienetan sosik espero gabe, txalo zaparraden zain egon gabe. Herrigintzan sinesten duten herritarrak dira, behetik gauzak egin behar direla pentsatzen dutenak, eskatzeko baino, emateko prestuago daudenak. Eta bai, maila indibidualeko irabaziei baino, alor kolektiboa lehenesten dutenak. Herri bizia nahi dute, eta horretarako, familiari, lagunei eta euren denbora libreari orduak jango dizkiete, tamalez.
Miresmen guztia politikari hauei, bertako herritarrekin osatutako aukera guztiei: txapela kendu eta aurreskua dantzatu. Kritika errazaren gainetik, ilusioz ekingo diote lanari, batzuetan hanka sartuz, baina gehienetan asmatuz. Ahal bada, umiltasunetik.
Gomendio txiki bat soilik: ez utzi burokrazia eta administrazio makinariari zuen ametsak oztopatzen. Frenatuko zaituzte, baina ekin berriro. Gure ametsengatik!