Eskola Kiroleko eraikin berezi horrek dituen lau hormetan, Amasa-Villabonan praktikatzen diren kirol batzuk irudikatzen dituzten horma-irudiak margotu dira: igeriketa, halterofilia, euskal pilota eta boleibola.
Artelan hauek sortzeko Nexgraff artista ezaguna kontratatu du Udalak. Ez da Nexgraff-ek (Nextor eta Aitor Otaño aita-semeak) gure herrian egindako lehen lana, dagoeneko hainbat horma-irudi ikusgarri eginak baititu, besteak beste, Amasako pilotalekuan edota Fleming Herri Eskolako eraikinetan. Udalak 5.950 euroko inbertsioa egin du kaleko artea eta kirola uztartzen dituen ekimen honetarako.
Herriko hainbat kirol talderi keinuak
Eskola Kiroleko eraikinak lau fatxada dituela baliatuta, Nexgraff artistak lau kirol ezberdin irudikatu ditu, eta Amasa-Villabonan kirol hauetan lehiatzen duten taldeak daudela kontuan eduki nahi izan du.
Horrela, igeriketako muralean, igerilariaren txanoan "T ikt" hizkiak agertzen dira, Olaederra kiroldegian aritzen den Tolosaldea IKT igeriketa taldeari erreferentzia argia eginez.
Boleibol kirolaren irudian emakume jokalari bat agertzen da more koloreko elastikoarekin, gure Aiztondo nesken boleibol taldearen kolorearekin, alegia.
Gure herrian tradizio luzea duen Halterofilia kirola ere presente dago eta horma-irudian agertzen den pultsularietako batek, Zizurkil eta Villabonako Danok Danena taldeak erabiltzen dituen koloreak ditu elastikoan.
Olaederra pilotalekura begira dagoen horma euskal pilotari eskaini dio Nexgraff-ek, eta Villabonan jokatzen den errebote modalitateko "botiloa" margotu du iskin batean, Behar Zana pilota elkarteari keinu argi bat eginez.
Kaleko artea sustatzen jarraitzeko konpromisoa
Udaleko kultura sailetik kaleko artea sustatzen jarraitzeko asmoa duela adierazi du udal gobernuak. Horrela, datozen urteetan ere horma-irudi edo mural gehiago egingo direla aurreratu dute. Izan ere, arte modalitate honek herriko kaleei kolorea eta bizitasuna eskaintzen diete eta hori balorean jarri nahi du Udalak. Bestalde, ez da baztertzen Amasa-Villabonako kaleetan arte espresio gehiago ere ezartzea (eskultura...).
