EAJk irmoki babesten du mugikortasun jasangarria eta bizikleta garraiobide osasungarri gisa erabiltzea. Hala ere, maiatzean Udalak aurkeztutako bidegorri plana ez da egokia Irurarentzat, udalerriko eguneroko jardueran eta erabiltzaileen segurtasunean eragin kaltegarriak izango lituzkeelako.
Proiektuak Gipuzkoako Foru Aldundiak eraikitako bidegorria Anoetarekin lotzea proposatzen du, baita Kale Nagusitik behera eginez. Trazadura horrek 22 aparkaleku ezabatuko lituzke, dagoeneko eskasia den eremu batean, eta hainbat saltokik egunero erabiltzen dituzten karga eta deskarga guneak desagerraraziko lituzke. Zazpi establezimenduk jada adierazi dute neurri horrek izango duen eragin negatiboa beren jardueran.
Bide-segurtasunari dagokionez, Kale Nagusia da herriko trafiko handiena duen bidea, eta hainbat bizitegi-kalerekin lotura du. Ibilgailuen eta bizikleten arteko elkarbizitza espazio hain estu eta jendetsu batean ez litzateke segurua izango, eta istripuen arriskua nabarmen handituko litzateke. Horrez gain, kalean dauden bi autobus geralekuek ere eragina jasango lukete: erabiltzaileek bidegorriko eremutik bertatik igo eta jaitsi beharko lukete, segurtasunik gabe.
Proposamenaren alternatiba
Alternatiba gisa, ibai ondoko pasealekutik egitea proposatzen dugu bidegorria. Kale Nagusiarekiko paraleloa den trazadura da, 362 metro luzeagoa baino ez, eta askoz atseginagoa, ekologikoagoa, merkeagoa eta seguruagoa litzateke. Horregatik, 2026ko aurrekontuetan pasealeku hori egokitzeko eta bidegorri segurua eta beharrezko zerbitzuekin hornitua eraikitzeko azterketa eta exekuzioa jasotzea proposatzen dugu.
Adostasunez eta entzute aktiboz
Azpimarratzekoa da udal gobernuaren proiektu proposamena ez dela kontrastatu Gipuzkoako Foru Aldundiko Mugikortasun departamentuarekin. Gure ustez, halako dimentsioko edozein proposamen erakunde eskudunekin koordinatu behar da, eta herritarren iritzia kontuan hartu.
Horregatik guztiagatik, EAJtik Irurako udal gobernuari eskatzen diogu proposamen hau berriro azter dezala, eta segurtasuna, adostasuna eta tokiko merkataritzarekiko errespetua bermatuko duten alternatibak balora ditzala. Gure ustez, ezinbestekoa da udalerriko eragile ekonomikoen ahotsa entzutea, are gehiago herriko merkataritza une zailak bizitzen ari den honetan.