ZIOEN AZALPENA
Amasa-Villabonako udalerria ez da herrigunea bakarrik. Gure udalerriaren parte dira landa-eremua, baserriak eta horietara iristeko erabiltzen diren bideak ere. Baserri-bideek funtzio garrantzitsua betetzen dute bertako bizilagunen eguneroko bizitzan, nekazaritza eta abeltzaintza jardueretan, eta, oro har, landa-eremuaren eta herrigunearen arteko loturan.
Azken aldian, hainbat baserri-bideren egoerari buruzko kezka eta kexak jaso dira. Zenbait tokitan bideen egoera ez da behar bezalakoa, eta zuloak, hondatutako tarteak eta mantentze-lan falta nabari dira. Egoera horrek eragina izan dezake ibilgailuen joan-etorrietan eta, batez ere, baserrietan bizi diren herritarren egunerokoan.
Herritarrek bideen egoerari buruz egindako oharrak entzun eta erantzun beharrekoak dira. Ez litzateke nahikoa arazoa gertatzen denean soilik konpontzea; beharrezkoa da baserri-bideen egoeraren azterketa sistematikoa egitea eta mantentze-lanetarako plangintza egonkorra izatea.
Era berean, aurrekontuetan bide horiek behar bezala mantentzeko behar adina baliabide ez dagoela adierazi bada ere, kontuan izan behar da baserriak ere Amasa-Villabonako udalerriaren parte direla, eta bertan bizi diren herritarrek udalaren zerbitzu eta azpiegitura egokiak izateko eskubidea dutela.
ERABAKI - PROPOSAMENA
- Amasa-Villabonako Udalak udalerriko baserri-bideen egoeraren azterketa eta inbentarioa egitea, bide bakoitzaren egoera, beharrak eta lehentasunezko jarduketak identifikatuz.
- Egoera txarrenean dauden bideetan, bereziki zuloak eta ibilgailuen zirkulaziorako arriskutsuak edo kaltegarriak diren tarteak, ahalik eta epe laburrenean konpontzeko beharrezko lanak egitea.
- Udalak baserri-bideen urteko mantentze-plana prestatzea, konponketak eta prebentziozko mantentze-lanak modu programatuan egiteko, arazoak larritu aurretik esku hartzeko.
- Hurrengo udal-aurrekontuetan beharrezko partida ekonomikoa aurreikustea, baserri-bideen mantentze eta hobekuntza lanak behar bezala gauzatu ahal izateko.
- Aurrekontuetan gaur egun horretarako nahikoa baliabide ez badago, Udalak finantzaketa-aukerak eta diru-laguntza publikoak aztertzea, beharrezko jarduketak egin ahal izateko.
- Udalak baserritarren eta landa-eremuko bizilagunen iradokizunak eta beharrak jasotzeko bide eraginkorra ezartzea, bideen egoerari buruzko gorabeherak Udalari jakinarazi eta haien jarraipena egin ahal izateko.
- Udal Gobernuak mozio honetan jasotako neurrien inguruan egindako jarduketen berri ematea Udalbatzari, dagokion batzordean edo osoko bilkuran urtea bukatu baino lehen.
Amasa-Villabonan, 2026ko Urriaren 21ean
Amasa Villabonako EAJ-PNV Udal taldea