Lau urtez behin egiten den harri-jasotzaileen Albizuri Haundi txapelketa larunbatean, 17:30ean hasita, jokatuko da Amezketako Larrunarri frontoian. Herrian dagoen 166 kiloko harri irregularrarekin zazpi kirolarik parte hartuko dute txapelketan; Beñat Telleriak, Gorka Etxeberriak, Xabier Aranburu "Guzta"-k, Aimar Galarragak, Paulo Azpiazuk, Imanol Royo "Laratain"-ek eta Gari Garmendiak.
Sarrerak proba hasi baino ordu erdi lehenago jarriko dira salgai, 15 euro balioko dute. Aurreko edizioa, 2019an jokatutakoa, Jokin Eizmendik irabazi zuen. Probako errekorra berriz, Goenatxo II.ak jarri zuen 1996an, 15 aldiz jaso zuen Amezketako harria.