Pasa den ostiralean maiatzaren 28ko udal-hauteskundeetan aurkeztuko den Alkizako Abertzale Ezkertiarrak zerrendaren aurkezpena egin da Alkizan. Egungo alkatea, Inaki Irazabalbeitia, izango da zerrendaburua beste behin. Gainerako hautagaiak hauek dira: Ana Agesta, Jose Mari Aranzabe, Nagore Arizeta, Koldobika Jauregi, Gillermo Otegi eta Unai Sorarrain. Ordezko gisa Shrabani Aranzabe, Ainhoa Jauregi eta Ina Soria egongo dira.
Aurkezpenean azaldu denez, hurrengo lau urteetarako lan-ildo nagusia legealdi honetan abian jarri diren proiektuak amaitzea izango da, bereziki plan orokorra eta Erretore-etxearen proiektua. Bestalde, gai hauek ere kontuan hartuko dituzte lanerako: herritarrei ematen zaizkien zerbitzuak indartzea, Fagus-Alkiza proiektua eta eskualde mailako egituren zuzendaritza-organoetan parte hartzea.